Lilly-mynbestuur en besigheidsreddingpraktisyn moet nou oop kaarte
speel
Deur Juran van den Heever

Die vakbond Solidariteit het vandag gesê dat die tyd aangebreek het dat die Lily-myn se besigheidsreddingpraktisyn (BRP) en mynbestuur oop kaarte met hul werkers, Solidariteit en die media moet speel.

Dit volg nadat die BRP en die mynbestuur sedert hul aanstelling in April deurlopend beloftes gemaak het rakende ʼn belegger vir die myn, maar doelpale word gereeld verskuif met nuwe verskonings waarom ʼn transaksie nie beklink kan word nie. Daarmee saam verbind die mynbestuur hul deurgaans tot salarisbetalingdatums vir die werkers, maar bly ook in gebreke om daaraan te voldoen. Intussen word werkers nou op ʼn daaglikse basis op ʼn onmenslike wyse in die pad gesteek deurdat die persoon ʼn kil brief ontvang dat hy of sy die perseel moet verlaat en dat geen statutêre betalings gemaak word nie.

Volgens Gideon du Plessis, hoofsekretaris van Solidariteit, word Solidariteit se lede ook versoek om nie enige sensitiewe inligting of werker-onvriendelike besluite aan die vakbond te rapporteer nie – die rede blyk ʼn vrees vir regsoptrede teen die bestuur te wees en ʼn poging om enige negatiewe nuusdekking te verhoed wat skynbaar ʼn belegger sal afskrik. “Die mynbestuur en BRP se gedrag en optrede is egter besig om werkers in so ʼn mate te benadeel dat die departemente van arbeid en minerale bronne se agente versoek word om saam met Solidariteit die werksaamhede van bestuur en die BRP te ondersoek,” sê Du Plessis. “Hulle moet ook aan die nagenoeg 180 krediteure ʼn verduideliking gee oor ‘n aanbod van ‘n plaaslike belegger wat hulle na bewering van die hand gewys het.”

Dit is ook onrusbarend en diskriminerend dat indien salarisbetalings nie op ʼn normale betaaldatum kan geskied nie, die Amcu-lede en intreevlakwerkers steeds 100% van hul salarisse ontvang omrede mynbestuur ingee weens dreigemente dat die myn afgebrand sal word as voorgenoemde nie betaal word nie, terwyl die vaardige werkers weke later eers betaal word. Dan word daar al meer bewerings gemaak dat seker vakbondlede en gemeenskapslede moontlik “omkoopgeld” van die maatskappy ontvang om protesoptredes te verhoed of te beëindig – hierdie bewerings sal ook ondersoek moet word, sê Du Plessis.

Na agt maande van leë beloftes, werkers wat sonder enige statutêre vergoedingspakkette afgelê word en ook nog op betaling van hul salarisse vir April, Mei en Junie 2016 wag, begin hier tekens van die Aurora-sage verskyn wat Solidariteit geweldig bekommerd maak, sê Du Plessis.  Selfs al word die beloofde beleggingsgelde binnekort ontvang, moet daar steeds ʼn ondersoek plaasvind rakende die oorsaak van die mynongeluk waarvan die uitkoms tot strafregtelike vervolgings kan lei as nalatigheid bewys kan word. Laasgenoemde ondersoek en ʼn evaluering van die BRP se bevoegdheid moet dringend gedoen word om sekerheid te kry of die mynbestuur en BRP inderdaad bevoeg is om die myn in die toekoms te bestuur omrede werkers se lewens en hul finansiële sekerheid nie verder in gevaar gestel kan word nie – in dié verband moet die geheime beleggers se identiteit bekend gemaak word sodat Solidariteit saam met die betrokke owerhede ook inligting tot ons beskikking aan die instansies kan oordra om seker te maak dat geen wanvoorstelling gemaak word nie en ons die beleggers kan bystaan met enige hindernisse wat hulle kan ervaar.

 

Nuwe Hoofraad – nuwe hoofstuk vir Solidariteit
Deur Wilmarie Brits

Solidariteit se nuwe Hoofraad vir 2017 is op Donderdag, 10 November aangewys. Die gebeurtenis was die begin van ’n nuwe periode van vyf jaar waartydens die Hoofraad die vakbond effektief op grond van die lede se belange gaan bestuur, ten einde te verseker dat die vakbond se grootste verantwoordelikheid, naamlik die welstand van die lede, nagekom sal word. 

Die nuut aangestelde Hoofraad het Steve Scott van die Mynboubedryf as president herkies, terwyl Blackie Swarts, van die Metaal- en Ingenieursbedryf as visiepresident gekies is. Baie geluk aan die nuwe Hoofraad – julle word alles van die beste toegewens vir die belangrike take en verantwoordelikhede wat voorlê. Ons glo en vertrou dat julle Solidariteit na nuwe hoogtes gaan neem.

Die Hoofraad is uit vyf nasionale raadslede vir elke Bedryf binne die vakbond saamgestel, soos volg:

Afgradering van Eskom deur S&P

Standard & Poor’s Global Ratings (S&P) se afgradering van Eskom is volgens die Demokratiese Alliansie (DA) ’n mosie van wantroue in Eskom en sy bestuur in die besonder, asook in die “relatief swak korporatiewe bestuur van staatsondernemings in die algemeen,” berig Netwerk24.

“Dit is hartseer en is ’n bewys van Eskom se ernstige gebrek aan leierskap, op direksievlak en op regeringsvlak, soos verteenwoordig deur Lynne Brown, minister van openbare ondernemings,” het die opposisie die naweek in ʼn verklaring gesê in reaksie op dié nuus Vrydagaand.

S&P het die gradering se vooruitsig negatief gehou, wat beteken ’n verdere afgradering van Eskom is nie buite die kwessie nie. Eskom was reeds een trappie onder beleggingsgraad op BB+, en is met een vlak tot BB verlaag.

Eskom self het Vrydagaand sy spyt oor die afgradering uitgespreek.

S&P het die groot druk op Eskom se geldsake vir sy besluit uitgelig en gesê daar is onsekerheid of die staatswaarborg van R350 miljard vir Eskom verleng sal word wanneer dit einde Maart volgende jaar verval.

Daarbenewens is Eskom tans in ’n hofsaak met die Nasionale Energiereguleerder (Nersa) gewikkel oor sy versoek om tariewe te verhoog. S&P het dié saak ook in sy besluit genoem.

Die regsimplikasies van die voetstootsklousule

Wanneer jy iets koop, is daar ’n geïmpliseerde waarborg dat die merx (die ding wat verkoop word) vry van enige gebreke is. Dit is egter moontlik om by hierdie geïmpliseerde waarborg verby te kom deur ’n vrystellingsklousule in die kontrak in te voeg wat sê die verkoop is voetstoots.

Die term voetstoots is ’n Nederlandse woord en word gebruik om ’n verkoop sonder waarborge te beskryf waar die merx verkoop word “soos dit is” met al sy tekortkominge.

Voetstootsklousules is baie algemeen in skriftelike koopooreenkomste en word dikwels met agterdog bejeën. Baie mense is van mening dat sulke klousules ’n kontrakterende party met ’n sterker bedingingsposisie in staat stel om die ander swakker kontrakterende party uit te buit en te misbruik. Omdat die merx gekoop word “soos dit is”, dink baie mense die verkoper kan nie vir enige gebreke wat later aan die lig kom, aanspreeklik gehou word nie. Hierdie siening is verkeerd en is ’n wanvertolking van die reg.

Die gemeenregtelike posisie

Ingevolge die gemenereg kan ’n koper beswaar aanteken waar die merx gebrekkig was ten tyde van die verkoop en waar die verkoper bewus was van die gebrek maar versuim het om dit aan die koper bekend te maak, wel wetende dat as die koper daarvan geweet het, hy óf nie met die koop sou voortgaan nie óf ‘n gunstiger koopprys sou beding het. In so ’n geval is die onus op die koper om die wanvoorstelling aan die kant van die verkoper te bewys.

Gevolglik sal aanspreeklikheid aan die kant van die verkoper ontstaan as ’n gebrek verborge is en nie sigbaar is nie.

Verborge gebreke is tekortkominge wat nie met die blote oog sigbaar is nie en verskuil is, byvoorbeeld ’n lekkende geiser of foutiewe bedrading. In so ’n geval kon die koper nie voor die verkoping redelikerwys van die gebrekkige kwaliteit van die merx bewus gewees het nie en behoort hy die verkoper vir so ’n gebrek aanspreeklik te kan hou.

Sigbare gebreke is foute wat merkbaar en sigbaar is vir ’n deeglike persoon deur ’n normale inspeksie van die merx, byvoorbeeld ’n stukkende venster of ’n duik in ’n deur. Hier is dit die koper se verantwoordelikheid om die merx deeglik te ondersoek en te inspekteer voordat hy dit koop, en gevolglik is dit hy wat die spit sal moet afbyt indien dit later sou blyk dat daar so ’n gebrek bestaan het.

Die waarborg teen verborge gebreke geld outomaties deur regswerking en maak deel uit van die naturalia (bepalings wat in die reël regtens geld vir elke kontrak van ’n bepaalde klas) van elke verkoopkontrak.

Die nuwe posisie – die WVB

Die Wet op Verbruikersbeskerming, No 68 van 2008 (“die Wet”) het ’n beduidende invloed op die gemeenregtelike waarborg teen verborge gebreke. Die Wet is egter nie van toepassing nie op ’n transaksie waar die koper ’n regspersoon is waarvan die batewaarde of jaarlikse omset ten tyde van die transaksie gelyk is aan of meer is as die drempelwaarde van R2 miljoen, soos van tyd tot tyd deur die Minister van Handel en Nywerheid bepaal.

Die Wet sal dus ook nie van toepassing wees nie waar goedere en dienste nie in die gewone loop van sake verskaf word nie. Byvoorbeeld, waar ’n huiseienaar sy huis wil verkoop en dit eenmalig verkoop en nie in die gewone loop van sy besigheid nie, sal die gemeenregtelike posisie soos hierbo bespreek, van toepassing wees. Dus val nie alle koopooreenkomste noodwendig onder die Wet en die beskerming vir die koper teen gebreke nie.

Artikel 55 van die Wet bepaal dat ’n koper ’n reg het om goedere te ontvang wat geskik is vir die doel waarvoor dit gekoop word, en dat dit van goeie gehalte, in werkende toestand en sonder gebrek moet wees.

Dit beteken dat dit nie saak maak of die koper die gebrek kon sien of nie, en of die verkoper die gebrek op bedrieglike wyse verberg het nie. Gebreke moet uitdruklik openbaar gemaak word en ’n algemene klousule dat die koper die eiendom aanvaar “soos dit is”, sal nie aanvaarbaar wees nie (solank die verkoop aan die Wet onderhewig is).

Hierdie bepalings geld egter nie waar die koper uitdruklik ingelig is dat die merx in ‘n spesifieke toestand aangebied word en hy uitdruklik ingestem het om dit in daardie toestand te aanvaar, of bewustelik opgetree het op ’n manier wat ooreenstem met aanvaarding van die merx in daardie toestand. Met ander woorde, as die koper bewus is dat die eiendom verkoop word in die toestand waarin dit staan op die datum van verkoop en waar die koper ’n geleentheid gehad het om die eiendom te inspekteer, sal die voetstootsklousule steeds deel van die ooreenkoms uitmaak.

Ten slotte

Dit is baie belangrik dat kopers en verkopers die begrip voetstoots moet verstaan voordat hulle enige koopkontrak aangaan. ’n Mens moet jou vergewis van die nuwe tersaaklike bepalings van die Wet en die regsimplikasies daarvan voordat jy ’n koopooreenkoms aangaan.

Verkopers moet versigtig wees as hulle ’n voetstootsklousule by ’n koopooreenkoms insluit en word aangeraai om regsadvies oor die afdwingbaarheid van sodanige klousule in te win. Insgelyks moet kopers ook regsadvies oor sulke klousules inwin voordat hulle so ’n ooreenkoms aangaan.

Bron: VDMA Prokureurs

Kinder-onderhoud in Suid-Afrika: Jou vrae beantwoord
Deur Candice Eve-Friis

Waaruit bestaan onderhoud?

Volgens wetgewing is ʼn kind geregtig op redelike onderhoud om voorsiening te maak vir klere, behuising, tandheelkundige en mediese sorg, onderwys en opleiding, en ontspanning (waar van toepassing). Beide ouers het ʼn plig om die kind ooreenkomstig hulle onderskeidelike vermoëns te onderhou. Die plig bestaan ongeag of die kind se ouers ongetroud is, of die kind aangeneem is en of die kind uit ʼn eerste of later huwelik gebore is.

Wat is die onlangse veranderinge aan onderhoudwetgewing en wat is die implikasies daarvan?

Die Wysigingswet op Onderhoud Nr. 9 van 2015 is op 9 September 2015 aangeneem. Hierdie wet word beskou as die volgende stap in meer as ʼn dekade van inisiatiewe deur die Departement van Justisie om die Suid-Afrikaanse onderhoudstelsel te versterk en remedies in plek te stel om diegene te hanteer wat nalaat om hulle onderhoudsverpligtinge na te kom. Die wysigingswet poog om, onder andere, navrae spoedig af te handel deur die afdwing van interimbevele, die uitreiking van onderhoudsbevele verder te reguleer en die onderhoudshof te bemagtig om, op grond van ʼn klag gelê dat ʼn persoon hulle onderhoudsverpligtinge versuim het, sy of haar persoonlike besonderhede aan die kredietburo te oorhandig.

Hoewel die doelwitte van die wet prysenswaardig is, is daar ongelukkig steeds rede vir kommer wanneer dit kom by magistraatskantore wat onderbeman en personeel wat onvoldoende opgelei is.

Veranderinge sluit in:

Sou ʼn persoon hulle onderhoudsbevel nie nakom nie, is dit nou wettig om hulle persoonlike inligting aan die kredietburo te oorhandig, wat gevolglik verhoed dat enige verdere krediet aan sodanige persoon toegestaan word terwyl hy/sy onderhoud skuld. In wese word die onderhoudwanbetaler geswartlys;

Sou ʼn onderhoudsbeampte nie daarin slaag om die persoon op te spoor teen wie die klag aanhangig gemaak is nie, mag die hof selfoonverskaffers gelas om enige inligting oor daardie persoon te oorhandig. Hierdie bevel sal slegs toegestaan word indien die hof tevrede is dat alle pogings aangewend is om die betrokke persoon op te spoor;

Interim onderhoudsbevele mag uitgereik word sou ʼn navraag uitgestel word. Die howe sal poog om onderhoudsnavrae so spoedig moontlik af te handel en met so min uitstellings as moontlik. Die hof mag egter ook, volgens hulle diskresie, tussentydse onderhoudsbevele toestaan om die klaer finansieel by te staan tydens die duur van die navraag, sou uitstellings plaasvind;

Die howe sal poog om getuies deur middel van subpoenas te bekom om feitelike getuienis voor te lê van die finansiële posisie van die persoon teen wie die klag ingedien is;

Kriminele aanklagte mag teen ʼn persoon aanhangig gemaak word wat versuim om die onderhoud te betaal soos deur hulle onderhoudsbevel bepaal en hulle mag gevangenisstraf wat nie drie jaar mag oorskry nie en/of ʼn boete in die gesig staar;

Enige persoon wat versuim om die hof van residensiële en/of werkveranderinge in kennis te stel, sal skuldig bevind word en mag gevangenisstraf wat nie ʼn jaar mag oorskry nie en/of ʼn boete in die gesig staar;

Klagtes wat by ʼn onderhoudsbeampte ingedien is, sal op die voorgeskrewe wyse deur hom/haar ondersoek word. Die beampte mag met ʼn lynnavraag in die magistraatshof begin in die area waar die klaer werksaam is, in teenstelling met slegs waar hy/sy woon; en

Onderhoudsaansoeke kan nou via e-pos beteken word in teenstelling met slegs persoonlik deur die balju van die hof, die onderhoudsbeampte of die polisie. Dit sal help om die teenwoordigheid by die hof te verseker van die persoon teen wie die onderhoudsklag ingedien is.

Hoe kan jy die onderhoudsbedrag verminder?

Indien jy nie langer kan bekostig om die gelaste bedrag te betaal nie, kan jy by die hof aansoek doen vir ʼn vermindering, onderworpe aan finansiële ondersoek.

Kan ʼn onderhoudsbevel deur instemming verkry word?

Ja, dit kan tydens die informele ondersoek gebeur wanneer partye ʼn geskrewe ooreenkoms aangaan (soms met die hulp van die onderhoudsbeampte).

Kan jy teen ʼn onderhoudsbevel appelleer?

Jy kan nie ʼn bevel by verstek appelleer nie of indien die bestaande bevel deur instemming daargestel is nie. Jy kan ook nie appelleer teen ʼn voorwaardelike bevel met betrekking tot die koste van ʼn vaderskaptoets nie. In alle ander gevalle kan jy appelleer, en ʼn kennisgewing van voorneme om te appelleer moet oorhandig word aan die klerk van die onderhoudshof waar die bevel uitgereik is. Die kennisgewing moet ook op die ander party bestel word binne 20 dae vanaf die uitreiking van die oorspronklike bevel. ʼn Appèl skort nie betaling van onderhoud in lyn met die bestaande onderhoudsbevel op nie.

Wat gebeur as die party wat beveel is om onderhoud te betaal versuim om jou te betaal?

As hy/sy versuim om die bepalings van die onderhoudsbevel na te kom en die bevel vir ʼn tydperk van 10 dae nie gehoorsaam is nie, kan jy by die onderhoudshof in die area waar jy woon aansoek doen vir magtiging om ʼn lasbrief vir eksekusie, ʼn bevel vir beslagleggingbevel van skuld, of ʼn loonbeslagleggingsbevel uit te reik.

ʼn Loonbeslagleggingsbevel is ʼn hofbevel wat deur die balju van die hof op die werkgewer van die wanbetaler bedien word, en die werkgewer beveel om aftrekkings van die wanbetaler se salaris of loon te maak ter vereffening van ʼn skuld deur die wanbetaler verskuldig aan ʼn derde-party-krediteur. Die wanbetaler se persoonlike inligting kan ook aan die kredietburo oorhandig word, wat verhoed dat enige verdere krediet aan die wanbetaler toegestaan word terwyl hy/sy onderhoud skuld. In wese sal die wanbetaler geswartlys word. Versuim om onderhoud te betaal is ʼn kriminele oortreding met óf ʼn boete óf gevangenisstraf daaraan verbind. Die enigste oplossing vir die versuimende party is om te bewys dat hy/sy nie kon betaal nie weens ʼn gebrek aan geld/inkomste.

Kan jy aansoek doen vir onderhoud in die middel van ʼn egskeiding?

Tydens ʼn egskeiding mag jy vind dat jou gade die betaling van sekere onkostes gestaak het. Suid-Afrikaanse wet laat jou toe om by die egskeidingshof aansoek te doen vir ʼn onderhoudsbevel vir jou kinders, onderhoud vir jouself, en ʼn bydrae tot jou regskoste (indien nodig). Jy sal ʼn beëdigde verklaring inhandig wat jou finansiële omstandighede uitspel en waarom jy finansiële bystand benodig, en jou gade sal op jou beëdigde verklaring antwoord met sy/haar eie beëdigde verklaring. Daarna sal die saak voor ʼn regter geargumenteer word, wat ʼn tussentydse bevel sal uitreik wat van krag sal wees totdat die egskeiding gefinaliseer is.

Kan jy aansoek doen vir onderhoud as jy nie getroud is nie?

As jy ongetroud is, kan jy by ʼn klerk van die onderhoudshof in die area waar jy woon en werk aansoek doen vir onderhoud vir jou kinders en/of vir jouself. Die klerk sal dan die ander ouer subpoena om vir ʼn onderhoudsnavraag te verskyn, waar die klerk sal poog om jou/die ander ouer se onderhoudskwessies te besleg. Indien geen oplossing bereik kan word nie, sal die klerk die saak na ʼn magistraat verwys, wat dan ʼn formele verhoor sal lei waar jy sowel as die ander ouer getuienis sal lewer aangaande julle finansiële omstandighede. Die magistraat sal dan ʼn beslissing maak, wat gelykstaande is aan ʼn hofbevel.

Wat as die ander party tot jou onderhoudnavrae werkloos is?

Indien dit die geval is, sal die magistraat die ondersoek uitstel en hom/haar toelaat om werk te soek. As hy/sy werkloos is maar huurkoopooreenkomste het waarvan jy bewus is, kan jy die magistraat inlig, wat dan mag beveel dat beslag gelê word op die meubels en dit verkoop word om onderhoud te betaal. Terwyl werkloos is kan jy by die Departement van Maatskaplike Ontwikkeling aansoek doen vir ʼn kinderonderhoudstoelae.

Het die kind ʼn onderhoudseis indien ʼn ouer te sterwe sou kom?

Ja, teen die oorledene se ouers se boedel. Hierdie eis geniet voorkeur bo erfgename, maar geniet nie voorkeur bo krediteure nie. Die eis bestaan in so verre dit vir die kind onmoontlik is om hom/haarself te onderhou, byvoorbeeld as die kind ʼn groot genoeg erflating ontvang om in sy/haar behoeftes te voldoen kan hy/sy nie onderhoud uit die boedel eis nie.

Is daar ʼn verpligting op grootouers om ʼn kind te onderhou?

As nie een van die ouers die kind kan ondersteun of onderhou nie, gaan die plig oor na die grootouers toe (aan moeders- of vaderskant). As ʼn vader/moeder versuim om onderhoud te betaal, kan die ouer wat die primêre versorger is ʼn onderhoudsaansoek bring teen die grootouers.

Is daar ʼn plig op sibbe om ʼn kind te onderhou?

As nóg die ouers nóg die grootouers onderhoud kan voorsien, gaan die verpligting oor na die kind se sibbe (susters, broers, halfbroers en halfsusters), in lyn met hulle onderskeidelike vermoëns, maar slegs as die kind waarlik behoeftig is.

Is daar ʼn plig op stiefouers om ʼn kind te onderhou?

ʼn Stiefouers is nie onder die wet verplig om sy/haar stiefkind te onderhou nie.

Bron: Shepstone & Wylie

 

Suid-Afrikaanse wiskunde- en wetenskappunte steeds power
Deur Mariska Batt

Die burgerregte-organisasie AfriForum spreek hul misnoeë uit oor Suid-Afrikaanse skole se power resultate in die Trends in International Mathematics and Science Study (TIMSS).

Die feit dat Suid-Afrika nie wéér die swakste in beide hierdie vakrigtings gevaar het nie, behoort geen rede tot vreugde vir Angie Motshekga, die minister van basiese onderrig, en haar departement te wees nie. Suid-Afrika het vanjaar amptelik die tweede swakste in wetenskap en swakste in wiskunde op die TIMSS-wêreldranglys gevaar. Die bedenklike prestasie kan ook nie, soos Motshekga aanvoer, aan boelies in skole en ’n tekort aan fondse toegeskryf word nie.

“Hierdie situasie kan slegs beredder word indien die departement aanspreeklikheid vir die probleem aanvaar en ophou om die erns daarvan te ontken,” meen Carien Bloem, projekkoördineerder vir onderwys by AfriForum.

Maniere waarop die probleem beredder kan word, volgens haar, is dat: die tekort aan geskikte wiskunde- en wetenskaponderwysers aangespreek word deur meer beurse beskikbaar te stel vir onderwysstudente om in hierdie kernvakrigtings te studeer; onderwysers wat nie op standaard is nie, heropgelei of gedissiplineer word;
inmenging deur vakbonde soos die Suid-Afrikaanse Demokratiese Onderwysunie (Sadou) stopgesit word; ouers seker moet maak dat hul kinders skool bywoon;
ouers die skool se dissiplinêre kode ondersteun en hul kinders aanmoedig om dieselfde te doen; ouers aktief moet betrokke raak by skole se beheerliggaamverkiesings en dié se aktiwiteite; en skole se voedingskemas ondersteun en maatreëls in plek gestel word om te verhoed dat fondse vir sulke skemas verkeerd aangewend word. “So lank as wat die departement nie verantwoordelikheid vir die leemtes in die onderwysstelsel neem nie, moet ons self ingryp ter wille van ons kinders se toekoms,” het Bloem bygevoeg.

Suid-Afrika vinnig op pad om nommer een in mensehandel te word
Deur Marlien van der Westhuizen

Tans is Suid-Afrika 27ste op die globale slawe-indeks met ʼn geraamde 248 700 slagoffers. Dit het astronomies gestyg vanaf slegs 106 000 slagoffers in 2014 toe Suid-Afrika 126ste op die wêreldlys was. Verder is Suid-Afrika wyd bekend as is ’n bron, transito- en eindbestemming-land.

Tydens die 16 dae van aktivisme vanaf 25 November tot 10 Desember 2016 is die fokus op  die mishandeling van vroue en kinders in die land. Weinig ander kwessies het meer hierop betrekking as mensehandel. Ongelukkig is mensehandel een van die vinnigste groeiende georganiseerde misdade ter wêreld.

Die meeste slagoffers in Suid-Afrika is ons land se eie burgers en hulle word blootgestel aan misbruike soos prostitusie, dwangarbeid, pornografie, stroping van organe, kinderhuwelike en ook onwettige aanneming van kinders. 

Sedert 2014 tot vanjaar het die aantal mensehandelslagoffers in Suid-Afrika meer as verdubbel. Solidariteit Helpende Hand se Pêrels Uit As-tak het besluit om ’n inligtingsessie te hou om meer lig op die onderwerp te werp. Die tak bied ook die land se enigste studiefonds wat uitsluitlik vir gerehabiliteerde slagoffers van mensehandel is om hul lewens weer agtermekaar te kry.

Volgens Elize Bezuidenhout, ’n funksionele terapeut en voorsitter van die Pêrels Uit As-tak, is die studiefonds ’n kardinale deel van hul betrokkenheid by mensehandel. “Ons wil hierdie mans en vroue ondersteun om weer met hul lewens aan te gaan. Min organisasies sal hierdie slagoffers ’n tweede kans gee en ons wil dit verander. Die studiefonds word befonds deur skenkings sowel as die inkomste wat uit die kaartjieverkope van inligtingsessies soos hierdie gegenereer word,” sê Bezuidenhout.

Daar is egter ’n groot verskeidenheid maniere waarop die publiek betrokke kan raak en saamwerk om mensehandel teen te werk. Die inligtingsessie wat deur Bezuidenhout aangebied is, het nuttige wenke gegee oor hoe om ’n daadwerklike verskil te maak en ook hoe om jou geliefdes veilig te hou. Daar was ook ’n vertoning van Unthinkable, ’n fliek wat fokus op een van die werwingsmetodes wat die handelaars gebruik om slagoffers te vang.

Om meer uit te vind van mensehandel of om meer oor die studiefonds te wete te kom, kontak gerus vir Elize Bezuidenhout op 082 772 1821 of stuur ’n e-pos na elize@helpendehand.co.za.

Maak dít jou volgende stop

Die volgende stop-bordspel is die afdraaipad na pret vir die hele gesin. Met dié gewilde Afrikaanse bordspel sal die hele gesin vir ure kan saamspeel, hul kennis van Suid-Afrika, ons taal, mense en plekke toets en selfs spotlike stomstreke speel. Vul die pret aan met 'n tweede stel speelkaarte en siedaar – ure se pret! Die bordspel en ekstra stel speelkaarte is nou beskikbaar teen R400 (posgeld uitgesluit). Kontak Kraal Uitgewers by 012 644 4430 of stuur 'n e-pos na kraal@kraaluitgewers.co.za om van dié spesiale aanbieding gebruik te maak.